0

«۱»
اَکسا ءِ مسیت ءُ کنک ئِے برکتدار اِنت:

مسیتے اِنت کہ ڈیھے تھ ءَ ساچگ بوتگ کہ ھاوند پاک آئی ءَ برکت داتگ؛
ھنچو کہ وت دْرّائین ایت:
{ سُبحَانَ الّذي أسریٰ بِعَبدِه لَیلاً مِنَ المَسجِدِالحَرامِ إلَی المَسجِدِ الأقصَی الَّذي بارَکنَا حَولَهُ لِنُریَهُ مِن آیاتِنا إنَّهُ هُوَ السَّمیعُ البَصیر} -الإسراء ۱-
گْوشتگ اَنت اَگاں اَکسا ءَ ھچ سرتری ءُ شَرّی مہ بوتین ھمے یکیں پاگَپّ بسّ اَت ئِے، ءُ دُرُستیں برکتانی واهُند اِنت۔

«۲»
چہ ھرام ءِ مسیت ءَ ءُ پد دومی مسیت ماں ڈگار ءِ سر ءَ اِنت :

مھتر ابوزر -کہ ھاوند چہ آئی وشنود بات- گْوشتگ: اَے پاکیں ربّال کجام مسیت بنداتیں مسیت اِنت کہ ڈگار ءِ سر ءَ جوڑ بوتگ؟
دْرّائینت: ھرام ءِ مسیت، گْوشت ئِے: رَند چہ آئی کجام مسیت اِنت؟
دْرّائینت: اَکسا ءِ مسیت، گْوشت: ھر دوکینانی میانجی ءَ چُنت سال شملگ بوتگ؟
دْرّائینت: چِل سال، گڑاں ھر کجا کہ نماز ءِ وھد رَس اِت بُوان ئِے سرتری ماں ھمائی اِنت۔ -صحیح بخاری-

«۳»
مسلمانانی بنداتی کِبلہ اِنت:

پیسر چہ اِیشی کہ کِبلہ سون ء ھرام ءِ مسیت ءَ بدل بہ بیت داں شانزدہ یا ھبدہ ماه مسلمانانی کِبلہ اَکسا ءِ مسیت بوتگ۔

«۴»
پاکرَبّال -کہ ھاوند ءِ دْروت پہ آئی سر بات- ءِ اَسراء ءِ جاہ:

اسراء چہ بنداتی مسیت ءَ دیم پہ دومی مسیت ءَ کہ ڈگار ءِ سر ءَ بنا بوتگ سر گرگ بوت، ءُ ھر دو مسیتانی سرتری ءُ ھر دوکینانی پھر ءِ گرگ، ءُ ھر دو کبلھانی گندگ پاکربّال ءِ کسمت بوتگ۔

«۵»
مھتر موسا -دْروت ءُ دْراھی پر آئی سر بات- ءِ دُوا:

مھتر موسا اینچو پاکمنّیں ڈیھ ءَ مزن ءُ بوھیر زانت ئِے کہ وتی مرک ءِ وھد ءَ چہ ھاوند ءَ اَرداس کُت کہ آئی ءَ آدا نزّینک بہ کنت۔
امام بُھاری ماں وتی پاکتْرانی وانگی ءَ چہ پیگمبر -کہ ھاوند ءِ دْروت پہ آئی سر بات- گْوش ایت: “آ وھد کہ موسا چہ پاکیں ھاوند ءَ اَرداس کُت کہ آئی ءَ سِنگ ءِ پِرینگ ءِ کچّ ءَ بہ پاکمنّیں ڈیھ ءَ نزّینک بہ کنت، اگاں من اودا بہ بوتین آئی ءِ مانش ءَ کہ راہ ءِ نیمگ ءَ ءُ سُھریں دِکّ ءِ چیر ءَ اِنت پہ شما پیش ءَ کُتاں”۔
امام نووی گْوش ایت: مھتر موسا ءِ اَرداس ءِ سوب کہ لوٹ اِت پاکمنّیں ڈیھ ءَ نزّینک بہ بیت پہ آ ڈیھ ءِ پاکی ءُ پاکربّالانی شرّی ءُ دگہ کسانی کہ اودا مانش بوتگ اَنت۔

«۶»
مستاگی پہ آئی پتھ کنگ ءَ:

یکّے چہ نبوّت ءِ ٹِک ءُ نشانیاں ھمیش اِنت کہ پاکرَبّال -کہ ھاوند ءِ دْروت پہ آئی سر بات- پیسر چہ آئی پتھ کنگ ءَ مستاگی دات ئِے کہ پتھ ءُ گِرگ بیت اِنت، ھنچو کہ چہ اوپ ء مالک -کہ ھاوند چہ آئی وشنود بات- گْوشت: ماں تبوک ءِ گَزوہ ءَ رسول الله ءِ نَزّ ءَ آتکاں کہ ماں کسانیں گِدانے اَت ئِے ءُ دْرّائینت: شش چیز پیسر چہ کیامت ءَ پیش کاینت: منی مرک ءُ پدی پاکمَنّیں گِس ءِ پتھ کنگ۔۔۔ -صحیح بخاری-

«۷»
مَھیم ءِ جُلّ ءُ اَزباب دیم پہ آئی بند کنگ بیت اِنت:

دُرستیں نیکراھی زانتکار تپاک اَنت کہ اَکسا ءِ مسیت ءِ گِندُک کنگ ءُ ماں آئی نماز وانگ سوت ءُ سواب دار ایت، ءُ مَھیم ءِ ازباب بند کنگ نہ بنت مگہ سون ء سے مسیت ءَ کہ یکِے چہ آیاں اَکسا ءِ مسیت اِنت؛
پاکیں ھاوند ءِ ربّال مِھتر مَھمد -کہ ھاوند ءِ دْروت پہ آئی سر بات- دْرّائین ایت: مَھیم ءِ جُلّ ءُ ازباب بند کنگ نہ بنت مگہ پہ سے مسیت ءَ، ھرام ءِ مسیت ءُ رسول ءِ مسیت ءُ اَکسا ءِ مسیت۔ -صحیح بخاری-

«۸»
نماز وانگ ءِ سوت ءُ سرتری ماں آئی:

اَبداللہ ء اومر چہ پاکرّبال ءَ روایت کنت کہ دْرّائینت:
وھدے کہ مھتر سلیمان ء داوت -کہ دْروت ءُ دْراھی پہ آیاں سر بات- پاکمَنّیں گِس ءِ ساچَگ ءَ آسر کُت، سے چیز چہ ھاوند ءَ دزواھی کُت:
ھکم ءُ دادوری یے کہ متابک گوں ھاوند ءِ ھکم ءُ دادوری ءَ بہ بیت اِنت ءُ بادشاھی کہ رند چہ آئی کسّے ءَ مہ بات ءُ ھر کسّے کہ اِیوک پہ نماز کنگ ءِ کَست ءُ نیّت ءَ اِے مسیت ءَ بئیت ھنچو روچے کہ چہ وتی مات ءَ بہ دنیا آتکگ چہ گناھاں پاک بہ بیت، ءُ پاکرَبّال دْرّائینت:
بلے چہ آئی دو دزواھاں کہ لوٹ اِتگ اَت داتگ بوت اَنت ءُ اُمیتواراں سیُمی ھم پدیرگ بہ بیت۔

«۹»
جڈال نہ پُتر ایت ئِے:

پاکیں نبی ءَ دْرّائینت:
شمارا چہ جڈال مسیھ ءَ بیم دیاں، شمارا چہ جڈال مسیھ ءَ بیم دیاں۔۔۔
آئی بادشاھی ءِ پراھی ءُ مزنی دُراھیں جاگھاں رَس ایت، تیوک ءَ چار مسیت ءَ نہ کیت اِنت “ءُ ھما درگت ءَ ھرام ءِ مسیت ءُ اَکسا ءِ مسیت ءُ تور ءُ مدینہ ءَ نام گِپت”۔ -روایت احمد-


رَجانک: میران البلوچ

شماره دوم نشریه دانشجویی دو زبانه پلگار (دانشگاه علوم پزشکی ایرانشهر)

مقاله قبلی

نظرات

پاسخ دهید

نشانی ایمیل شما منتشر نخواهد شد.