0

سید زهور شاہ هاشمی بلوچی زبان ءِ یک ادارھے نام اِنت، آ یکے بوتگ بلے آئی ءِ پگر، آئی ءِ ازم چو ادارھے ءَ بوتگ اَنت،
ءُ شما سرپد اِت کہ انسان مِر اِیت، مردم مِر اِیت بلے پگر مان اِیت ءُ نمیران بیت
پمیشکا ما نبیس اِیں “ نمیرانیں سید ھاشمی ”
واجہ 21 اپریل 1926 ءَ ماں گنجیں گوادر ءَ واجہ سید مھمد شاہ ءِ لوگ ءَ چم پَچ کرت اَنت.
زان آں پاکیں ھاوند ءَ بلوچی زبان چہ بدواہ ءُ زوراکانی مزن نیشیں دپ ءَ رکّینگی اَت پمیشکا اللہ ءَ بلوچ راج ءَ سید ءِ وڑیں دوزواھے بکشات
سید ءَ اربی ءُ پارسی چہ وتی آریپیں پت ءَ دَر برت.
نمیرانیں سید اُردو ءُ انگریزی ءَ هم زانتکار بوتگ ،
بلوچ ءِ راجدپتر شاھد اِنت کہ واجہ ءِ دل پہ ماتیں زبان ءَ پہ راج ءَ سُتکگ .
1946 ءَ کہ گوادر مشکت ءِ ایر دست ءَ اَت، واجہ ءَ انجمن اسلاہ ء بلوچاں بندات ایر کُرت.
همے نیمون ءَ بلوچی دیوان ءِ بن گیج ئِے ایر کُرت.
ھدا امرزی ءَ جد ءُ جھد ءِ نام ءَ یک هال تاکے شنگ کُرت،
بلے مشکت ءِ واگداراں واجہ ءِ اے کار دوست نہ بو ت ،
چیزے وهد ءَ رند سید ءِ جهدانی دیم گِرگ بوت ، انجمن پْرشت ءُ سیدچہ گوادر ءَ دراں ڈیھ کنگ بوت.

1949 ءَ واجہ سید پہ دکتر جاهین سڈا سر ءِ گْوشگ ءَ هندوستان ءَ شُت کہ بلوچی زبان ءِ بارہ ءَ گیشتر پٹ ءُ پول بہ کنت .
ءُ اود ءَ واجہ ءَ پہ بلوچی زبان ءَ بازیں پٹ ءُ پولے کت۔
پد ءَ
1950 ءَ واجہ کراچی ءَ اتک، اد ءَ وتگش ءِ کار مستر جوڑ کنگ بوت
واجہ ءَ اے وتگش ءِ تُرو ءَ بلوچ راج ءُ بلوچی زبان ءِ سک باز ھزمت کت .
مردمے کہ لوٹ اِیت منی زبان مدام دیمتر ءَ کِنزان بہ کنت گڑا مدام ھمے ھیال بیت کہ کجام نہ کجام وڑ ءَ بلوچی زبان دیم ءَ بہ رَوت پمیشکا واجہ ءَ 1952 ءَ گوں وتی اے دگہ بلوچ دوزواھاں (بلوچی سَرچمگ) ءِ نام ءَ زبان ءِ دیمروی هاتر ءَ یک انجمنے بنگیج کُرت.
سید ءَ پہ (سَر چمگ) ءُ بلوچی زبان ءِ دیمروی ءِ هاتر ءَ بلوچستان ءِ گیشتریں هند ءُ دمگ دو ماہ ءَ پُرّیں ترّ اِت ءُ گول اِت
بلے بژن چہ وت ماں وتی نا تپاکیاں سَر چمک نہ سبز اِت ءُ سرچمّگ ءِ تاک لیمّراں بوت اَنت .
بلوچی زبان ءِ اے شھزانت چہ بلوچانی اے نا تپاکی ءَ دل پروش نہ بوت . واجہ ءَ گوں وتی نزوریں کوپگاں بلوچی جھد برجم داشت،
بلے
1955ءَ شومیں رنج ءِ نا دْراھی ءَ واجہ گْور جَت
گوں ھمے نادْراھی ءَ کہ واجہ ئِے روچ پہ روچ نزور کنان کُرت بلے انگت چہ بلوچ ءُ بلوچی ءَ بے هال نہ بوت مدام گوں بلوچی ءَ سَر ءُ چیر اَت.
بلوچی زبان ءِ پٹ پول ءَ بلوچستان ءِ گیشتریں هند ءُ دمگاں پاد شپاد ءَ یک یک گالوارے ءِ هاتر ءَ تَرّ اِت کہ بلوچی گوهر کیمتی لبزاں پَٹ ءُ پول بہ کنت

سید ھاشمی ءِ نبشتگیں لھتے وانگیانی نام: 👇

۱: بلوچی زبان و ادب کی تاریخ
۲: سچکانیں سسّا (لچہ)
۳: شکّلیں شھجو
۴: گِسد گْوار
۵: انگر ءُ تْرونگل
۶: بْرتکگیں بیر
۷: تْراپ کنیں تْرمپ
۸: سید نمدی (رم)
۹: سید گنج (بلوچی ءِ اولی بزانبلد) (کہ واجہ ءِ مسترین ءُ نامی ئیں وانگی اِنت )
۱۰: بلوچی سْیاھگ
۱۱: بلوچی بنگیجی
۱۲: بلوچی اردو بول چال
۱۳: سستگیں دستونک
۱۴: کلام اللہ ءِ سیّمی جزء (جزء عم ) رجانک
۱۵: شھلچہ کار
۱۶: نازک. گدار
۱۷: میرگند
۱۸: گاریں کلدار
۱۹: چکاسنگ
۲۰: بے سرگال
۲۱: زوتگر ءُ دیرھل
۲۲: بلوچی دلپسندیں لچھکاری
۲۳: شھگوستن شاھار
۲۴: گمے تالان کناں

واجہ گْوش اِیت کہ من ءَ اے گم نہ اِنت کہ پہ منی مرگ ءَ منی چُک چورہ بنت، ھَو من ءَ اے گم ھست اِنت کہ من مُرت آں بلے پہ بلوچی ءَ ھچ نہ کت۔
4 مارچ 1978 ءَ واجہ ءَ اے کوڑھیں امروز یلہ دات، اللہ واجہ ءِ مانش ءَ روژنا کنات۔
واجہ ءِ درستی اُمر 52 سال بوتگ

انچوش سما بیت کہ گْوش ئے زان آں اللہ ءَ سید بس پہ بلوچی زبان ءِ ھاتر ءَ ودی کتگ۔

بیا پد ءَ شتکیں تلارانی دل ءَ دِرّاں کن ایں
گرانبھائیں دوستی ءُ مھر ءَ پد ءَ ارزاں کن ایں۔

دور نہ اِنت منزل ھزار ناز ءُ ھزار گنجیں سید
ھمبلاں زور ایں چو کور ءَ دور سریں رُمباں کن ایں۔

(سید ھاشمی)

اگاں هاوند چہ انسان ءِ کِرداں پَردگ ءَ چِست بہ کَنت

مقاله قبلی

مِسل ء بشّامی یک شَلیں سْیاهیں جمبر ءَ | مبارک کازی

مقاله بعدی

نظرات

پاسخ دهید

نشانی ایمیل شما منتشر نخواهد شد.