0

زاناں سیـہ مـار ءِ مَرگ تریاک انت
بلے واھگ چَہ درستاں نازاک انت

پُلّ ءُ ورنائی ھر دو بے آ سر
پُلـیں ورنـائـی ءَ گُروناک انت

مـَرگ مسـتاگ انت وژدلیں مَرگ ءِ
بے وسیں زِند؟ زند بے واک انت

نہ بیت دیمـپاں کـسّ سر کونڈاں
واھگ ءِ بور ءُ دوستی ءِ ڈاک انت

چون دْروہ ایت گم جگر بُرّیں
زند آئی ءِ آ زند ءِ اولاک انت

پہ تو ھـانـل بھـا منـی زند ءِ
بیلے ءُ نیم ءِ پَنّ ءُ مُزواک انت

مـوتـک ! رھبنـداں! ! باج اِمروز ءِ
مستریں زور ءُ بُرز تریں جاک انت

سستگ اوتاگ اوست ءُ اُمیت ءِ
اَنگت پمّن کسے ھدوناک انت

تـَو مُـرادان ئے مـن مـُرادیـگاں …
یک سرء شھد ءُ یک سرے ھاک انت

دْرتکگ اوھنـگ انـت پـہ گـُل ءِ رَکـّاں
دل گوش ئے لال ءِ شِمشک ءِ تاک انت

بے میارئے چَہ ھون ءِ ھوشام ءَ
سرجمـیں زندمانی ات پـاک انت

چونیں یک بے تواریں بیگاھے!
درد پـاداں گِران ءُ پیـداک انت

تُرس اِنت ” ند ” چَہ نبشتگاں بَچّ ایت
مـرچـی دسـرندئے بـاز وانـاک انـت

شنگ اِتگ دل گوں تْرانگ ءُ درداں
سـید اوپـار ءِ دامنـوں چـاک انت

سید زهورشاه هاشمی

بلوچی سیاهگ ءِ راست نِبیسّگ | “ءُ”

مقاله قبلی

بلوچی سیاهگ ءِ راست نِبیسّگ | “اِت ، وں”

مقاله بعدی

نظرات

پاسخ دهید

نشانی ایمیل شما منتشر نخواهد شد.