ماتیں زُبان

زبان یک چیزّے کہ هجبر چہ انسان ءَ جتا بیت نہ کنت.
انسان ماں زبان ءِ کالب ءُ زنجیر ءَ پِگر ءُ سسّا کنت.
گوں زبان ءَ وتی چاگرد ءِ مردماں گوں هَبر ءُ رهوت کنت.
گوں زبان ءَ وتی دل ءِ درداں درشان کنت ءُ وت ءَ گوں زبان ءَ گَل ءُ بچکندان کنت.

مروچی مئی دمگ ءَ بازیں دلے گوں شهد ءُ شیرکنیں بلوچی زبان ءِ ساد ءَ گوں وت هور ءُ همراز اَنت.
ماتیں زبان یک گوهرے کہ سَوَب بیگ ءَ اِنت داں مروچی بلوچ راج ءِ بازیں دود ءُ ربیدگے زندگ بہ بنت ءُ آئی ءِ شرکنیں تام پہ ڈنّی زباناں بزاں ابید چہ بلوچاں هم رستگ.

بزان اِت کہ زبان ءِ بیران بَیگ ءُ بربادی بزاں کَوم ءِ بربادی ءُ نابودی اِنت.
لهتے نازانت هست کہ گوش اَنت ماتیں زبان پہ مئی دیمروی ءَ چو کوهے دیم ءَ اِنت کہ نیل ایت ما دیمروی بہ کن اِیں.
آهانی باور ایش اِنت کہ مئی چُکّاں گوں ماتیں زبان ءِ وانگ ءُ زانگ ءَ بانداتی روچ دولتی وانگجاهاں دیم ءَ شُت نکن اَنت بلہ هجبر چُش بیت نہ کنت ءُ اِے باز ردیں گپّے.
اِے باور ءَ درواهیں زانتکار ءُ زبان زانت رد زان اَنت.

اپسوز ءِ گپّ ایش اِنت بازیں بلوچے چہ نوکیں پدریچ ءَ وتی چُکاں ڈنّی زبان (پارسی،انگلش، اردو،..) دپ ءَ دَیَگ ءَ اَنت ءُ اِے کار ءَ یک دیم ءَ شُتگیں کارے زاننت.
بلہ اِے هجبر دیمروی ئے نہ اِنت.

بچار اِت نمیرانیں سیدزهور شاه هاشمی ءَ کہ بازیں زبانے آهی ءَ وانت(پارسی،اَربی، اردو، سندی، انگلش،..)
بلہ پدا هم وتی ماتیں زبان ویل نہ کُت،
ءُ داں مروچی آ پٹّ ءُ پول ءُ آ جُهدے کہ نمیرانیں سیّد ءَ پہ بلوچ ءِ دیمروی ءَ کُتگ چہ دگراں کَم گِندگ بیت.

مئی دزبندی اِنت چہ سرجمیں بلوچ راج ءَ پہ وتی ماتیں زبان ءِ دیمروی ءَ جُهد بکن اَنت ءُ گوں درواهیں بلوچاں هم کوپگ بہ بہ اَنت.

هاتمی نژاد

منابع:

بلوچی شَهدیں زُبان