ما نزانت | برجان بلوچ

مئے چوش ھلاس بیت سپر ھُدا گواہ اِنت ما نزانت
اِد ءَ داں کیت رس اِیت ھبر ھُدا گواہ اِنت ما نزانت

چو مارا گوشتگ اِش مُدام تُپنگ کتار بند بہ بئیں
کے ءَ کن اَنت در پہ در ھُدا گواہ اِنت ما نزانت

چو مارا گوشتگ اِش کہ بسّ بہ بیت آس ئے روک کنگ
سُچ اَنت کئی دل ءُ جگر ھُدا گواہ اِنت ما نزانت

تپاک بہ بہ اِت کہ دیمتر ءَ تباھی اِنت تباھی اِنت
جھان ءَ گوانک جت سَتر ھُدا گواہ اِنت ما نزانت

چو گوشت اِش چَمّ بند بہ بنت ءُ دستاں زھم بْرھنگیں
سِد اِیت کُجام برات ءِ سر ھُدا گواہ اِنت ما نزانت

گُمان نہ کُت کہ سیاد تئی پہ یک سلام الیکی ءَ
دئے اَنت مارا آس ءُ چَر ھُدا گواہ اِنت ما نزانت

نہ وانگ ءُ نہ زانگ ءُ نہ پھمگ ءِ تھاری ءَ
شپے مِر اِیت سد نپر ھُدا گواہ اِنت ما نزانت

تو ھرچے گوشتگ ما کُتگ مئے نوبت ءُ مئے باریگ ءَ
وت ءَ کن ئے تو کور کَرّ ھُدا گواہ اِنت ما نزانت

مہ بیت راج مہ بیت ڈیھ مہ بیت مھر ءُ دوستی
چہ کار ءَ کاینت مال ءُ زَرّ ھُدا گواہ اِنت ما نزانت

او برجان ما پہ بے وسی نہ چار اِتگ نئیں مار اِتگ
نہ زانیں ما ھراب ءُ شَرّ ھُدا گواہ اِنت ما نزانت

برجان بلوچ