چِش

چِش دْرَچکے کہ گیشتر بلوچستان ءِ زِرباری ءُ گیشتر دشتیاری ءِ دَمَگ ءَ رُد ایت.
دگہ ملکاں هَم رُد ایت بلے کَمّ اِنت.

اِے دْرَچک سبزیں دْرچکے کہ آئی ءِ ساهِگ وَشّ ءُ سارْت اِنت.
دَشتیاری ءِ دَمَگ ءَ ماں هَر ڈَگارے ءِ تَہ ءَ یَک چِشے اَلَّم گِندگ بیت، پرچا کہ پہ دِهکاناں کہ ماں ڈگاراں رَو اَنت ءُ کِشت ءُ کِشار کن اَنت یا رُون کن اَنت یا رَهگْوَزے کہ گْوَز ایت پہ دْروستاں سارتیں ساهِگ اِنت.

اِے دْرچک اگاں پہ جْوانی آپ بہ وارت ءُ مَزن بہ بیت پہ مال ءُ دَلوتاں هم دَوار جاه اِنت.

چِش ءِ تاک باز کَسان اَنت ءُ گیشتِر پہ پَساں ڈُکّال ءِ وَهد ءَ کہ کاه مہ بیت بُرَّگ بَنت ءُ دَیَگ بَنت.(ٹال)
چِش ءِ دار ءُ ڈنگَر َ بے مَٹّ اَنت.
آئی ءِ کَسانیں دار پہ سوچَگ ءَ (گیشتِر پہ کَنْوَر ءُ وَرَگ ءِ پَیم کَنَگ) ءَ کارمرز بَنت.
اَنچُش آئی ءِ ڈَنگَر پہ واڑ ءُ پَلّ ءِ جوڑ کَنَگ ءَ کارمرز بَنت.

چِش ءِ زَنڈیں دار (کُنٹ) پہ لوگانی سَر ءِ گِرَگ ءُ پہ لانچ ءِ جوڑ کَنَگ ءُ… کارمرز بنت.

چِش ءِ پُلّ هم باز شَوک اِنت کہ بازیں گْوَمز ءُ مَکسکے آئی ءَ وارت (بینَگی مَکِسک هم چہ آئی ءَ وارت).

چِش ءِ بَر (سَمَّڑ) پہ پَساں یَک وَشّیں وَراکے کہ گیشتِر مالدار چِن اَنت ءُ اِیر کن اَنت داں زمستان ءَ پَساں دَے اَنت.

پَمیشکا شَهسَسّا نمیرانیں سید زهورشاه هاشمی چِش ءِ بارو ءَ گْوش ایت:

کاڑ ءُ گُل پَریّانی پُلّـیں دزگْوھاراں مـن
پہ بلوریں بانوراں دوستیں دیمداراں من

دُژمنیں چِگردانی دُژمنی پَمَن سُوتّ اِنت
سرجمیں کھیر بَلّ ءِ پُلّیگیں نِشاراں من

پـہ بلوچـی دیواناں منگہ ءُ مـڑایانـی
پُـر تپاک ءُ ھونکّـیں مَنَّھے پتاراں مـن

انگت ھم دل ءَ کَھر اَنت چمّن نابزانتکاری
پـہ تْرپوکیں اَلماساں گردن ءَ شھاراں من

آگھیں شپاں دْراجیں،راجءُ واھگءِ کوھیں
سوچکءُ سوزمان داریں دَرد ءِ گُمگُماراں من

بَیرم ءُ تلاہ سیِچکیں شیپگ اَنت پہ مھماناں
دُژمن ءِ جگر بنداں زُومّاں ایر کاراں من

چو کہ واھگدارے ءِ ھِیتّ وارتگـیں لُنٹاں
تاکوں شِمشُکیں لرزاَنت سبز ءِ مِنّت واراں من

کاڑی زاں سریں کُنٹوں پُشت تِکّہ لالانی
مَنگھیں نِیادانی سَیمی راز داراں مــن

سَمّڑاں چُلُمبیناں ، آ کھیب ءُ کْـرامانـی
ماھـیں سُومری سِند اَنت ھچ دل ءَ نیاراں من

پُل منـی زباد بوئیں پُلّک اَنـت پَـریانـی
دُرّ ءُ کُنّلاں کیدی ، پھک بـے کِماراں مـن

چو گُلانـی چو ٹیلّ اَنت ھجگ ءُ نازُکیں سرٹال
لَمب ءُ شاھاں چو شنگیں مھپراں سماراں من

سارتیں ساھگوں ندرْ اِنت پاکیں واھگدارانی
پـہ گُلاں مُرادیگ ءُ دیر اِنت راھچاراں مـن

کـد کـدیں سید بْیارئے ھانل ءَ کھیبانـی
گُل پری ءِ وَشّاتک ءَ سارتـیں پُلّ گواراں من